Caplutta S. Martin
La caplutta s. Martin deriva dil temps medieval tumpriv. Da quei datten perdetga il chor serraus da treis varts e surtut il clutger che regorda alla romanica. Probablamein ei la caplutta vegnida erigida dalla claustra da Mustér per ils subdits dalla cuort centrala, pauc suenter la donaziun entras igl uestg Tello da Cuera.
La caplutta da s. Martin sto haver fatg frunt agl incendi da 1492. Forsa ei la nav cun il plan horizontal spustau denton pli veglia. Sco ella caplutta da s. Sievi han ins prolongiu la nav enviers vest. Mo cheu para il local pli libers e pli aults.
Intern
Il plantschiu sura da gliestas el stil dalla gotica dat ad ella l'atmosfera emperneivla d'ina stiva grischuna. Las curnischs dil plantschiu sura, ornadas cun felgia, secruschan el medagliun central decoraus cun il vegl uoppen dalla Ligia Grischa. Vid quei bellezia plantschiu sura han ins anflau negin segn da meister. Ins suppona denton ch'ei setracti dil medem artist sco ella caplutta da S. Giacun, numnadamein digl entagliader Hans Zinsler.
Altar
In ulteriur bijou dalla caplutta ei il grondius altar cun alas e maletgs orginals dalla gotica tardiva che datescha digl onn 1508 e ch'ei semantenius cumpletamein. El deriva probablamein dil luvratori da Jörg Leerer da Kaufbeuren ella Germania dil sid.
Ella part interna digl altar serraus en fuorma da treifegl ves'ins sin il funs dad aur s. martin, il patrun caplutta, sco uestg cun il murdiu. Da sia vart sesanfla s. Giosch sco pelegrin cun la cruna als peis e s. Lucia cun la plaga vid culiez e la palma dalla victoria.
Las varts internas dalla alas muossan denter auter s. Catrina d'Alexandria cun la roda e s. Barla cun il calisch. Cura che las alas ein serradas, vesan ins l'aduraziun dils treis sabis. Era la vart davos igl altar ei decorada cun maletgs. Ella muossa Jesus egl Iert dallas Ulivas cun ils apostels che dierman e s. Veronica che tonscha il sudari al crucifigau.
Exteriur
In object tut special dalla caplutta ei igl esch vegl da lenn cun il bellezia muster da sulegl. Il s. Cristoffel vid la preit externa dil clutger ei vegnius malegiaus pér igl onn 1927. A caschun dalla restauraziun han ins schigentau ils mirs dalla caplutta e cuvretg il tetg da niev cun slondas. Il plantschiu da crap ei vegnius mantenius en siu stadi orginal. Perquei han ins stuiu far novas sutgas da treis peis.