Caplutta S. Giacun
La caplutta da S. Giacun sesanfla alla sortida vest dil vitg. Sco biaras autras capluttas ei era ella vegnida erigida agl ur dil vitg, per ch'ils pelegrins sappien supplicar per protecziun avon che bandunar il vitg. Ed il pelegrin engraziava era en quei liug per bien retuorn a casa. La caplutta da S. Giacun ei dil reminent restada entochen ils onns siatonta tut persula ella cuntrada.
La historia
La caplutta ei vegnida consecrada ils 16 da zercladur 1515. Igl onn 1986 eis ella vegnida restaurada cumpleinamein. Il zenn sin clutger deriva dil temps d'origin dalla caplutta.
La caplutta secumpona d'ina sempla sala cun ina fatschada ost da treis varts, nua ch'il spazi digl altar sesanfla. Ei setracta d'in semple altar dil baroc tumpriv. Il maletg digl altar che representa S. Giacun ei signaus da Christoph Guser, 1681. Igl antipendi e l'ornamentica dateschan pér dils 1750.
La decoraziun dalla caplutta
Il plantschiu sura original entagliau dalla gotica tardiva, cun artg a péz e finas frastgas ornamentalas da feglia per liung dallas curnischs longhitudinalas e traversalas ei in bjiou. Sper la rosetta centrala sesanfla igl uoppen dalla claustra da Mustér. Allura suonda il segn da meister ed il datum d'origin dil plantschiu sura, 1514.
Sin la curnisch longhitudina ha igl artist ed entagliader Hans Zinsler enscret siu num. Il bellezia plantschiu sura da lenn ei vegnius construius il medem onn sco la caplutta. Igl onn 1697 ei la caplutta vegnida prolungida enviers vest.
Vid la preit al nord penda in maletg dalla crucifigaziun. Quel muossa Jesus che fa grazia cun ils carstgauns. Vid la medema preit sesanfla il maletg dil S. Rusari digl onn 1626 che ha embelliu entochen 1910 igl altar dil S. Rusari ella baselgia parochiala. Maria, la regina dil S. Rusari vegn circumdada dad aunghels.
Dasperas sesanfla in maletg empau fuostgs da s. Francestg. Davostier pendan duas tablas votivas cun data nunenconuschenta.
La decoraziun externa
Las picturas externas, medemamein digl onn 1515, derivan dils fargliuns Sorengno dall' Italia dil nord. Enamiez stat S. Giacun il Vegl, a seniester S. Giosch, cun la cruna giudapeis, a dretg vesan ins S. Bistgaun vid il pal da marteri.
Il maletg seniester representa Cristus culs urdeins dalla passiun. Sil maletg dretg sepresenta S. Cristoffel. El accumpogna ils pelegrins sin lur viadis savens prigulus.
S. Giacun vegn festivaus ils 25 da fenadur cun in survetsch divin.